قصيدة مصيبة الزهراء عليها السلام

مصيبةالزهراء

آنـَه الذي سمًّاني البـاري كوثــر
واُمر والدي النبي يصليله وينحـر
بمحنة مصابي بويــه ناديتك تحظر
بضْعِتـَك الزَهْــره گلبهــا تِفطًّــر
*****
بعَبْرَه يبويه الليله هـالكلب نـاداك
وبروحي جم لوعـه وجم شهگه تترجــاك
عالخد تصب دمعــاتي من بعـد فـرگاك
ريت المنيه تحين لي وافرح الملکـاك
واشكيلك اشسـوت بيـه بعــدك عــداك
غصبوا حگوگي بويـه ونكـروا وصايـاك
شبوا لهيب النار وعادونه بالشر
بضْعِتـَك الزَهْـره گلبهــا تِفطًّــر
*****
يا بويه لِوَن‘ نورك عـن آلاهل غــاب
مْصَابك صُبح عْلينه بويه اعظم مصــاب
بحك الجـِزَه ويْانـَه شْعِملَتْ هالاصحـاب
ياحاله اخبـْرك بُويَه عن لهيب الباب
لو إلك حاله اشرح من ظلعي المنصاب
سِتري لِــوَنْ انطعن من گــوم الاجناب
ترضه يابويـه بعدك ضِلعي يتكسّر
بضْعِتـَك الزَهْـره گلبهـا تِفطًّــر
*****
بُويه الگلب من بعدك گلي شيصبـْـره
رَيتك تِشاهـد حالي ورَيتك تِحضْـــره
طِفلي وگع منْ حشاي مني عالغبـْــره
ظليت انوح ابحالي واسجب العبـْـره
بلوعَه جـِرت فضَّه للثاني وتـْذكــْرَه
وصاياالنبي ياناس لاتأذوا الزَهـره
نار التشب بضلوعي يابويَه تِسعَر
بضْعِتـَك الزَهْـره گلبهـا تِفطًّــر
****
طوك الحزن بحشايه وبروحـــي تشتـد
تسعر لهيب النار بدموعي عله الخَـد
دمـوع الجفن لفراگك بروحـي متهمـد
بُويه الدهــر وسهامـه بالگلب سَـدد
حتـًّه بچايــه عليـك يابويـه تحَـدد
وحِيده صرت وبروحــي للموت اتنهــد
صار الدمــع مدرار وهمومي تكثر
بضْعِتـَك الزَهْــره گلبهـا تِفطًّــر
*****
والي يحـز بكليبي ويعـذًّب الحـــال
صرنـه يبويه تالي بولية الانـــذال
يالما شفت جبل عن هالارض ينشــــال
ولو شفت شمس إلحـره تكيـدها اغـلال
صدك يبــويــه حيــدر يتْجَتفْ بحبال
بمصابي اركض وانخـه والدمع همًّــال
بضرب العصا اتلـوًّه وماظل إلي حـال
شفت المصيبه بعيني من خذوا حيدر
بضْعِتـَك الزَهْـره گلبهـــا تِفطًّــر
*****
جارت عليه الدنيه والنايبـه تحـوم
طيف المنيه بعيني يحضرني ويســـوم
للمرتضى ناديتـــه و الکلب مالـوم
عندي وصيه ابروحــي والاجــل محتوم
بضلمة ْ سـواد الليل تدفني يالمظلـوم
وسـرالکبر يبکه عن الناس مکتـــوم
ام الحسن وحسين کبرها يضل ســر
بضْعِتـَك الزَهْــره گلبهـا تِفطًّــر